CD Barco 1 – 1 UD Atios

[ ⚽️   Óscar Martín, min. 59 | ⚽️   M. Vilán, min. 90]

📝 Xabier R.A.
Non conseguen pasar do empate os homes de Manolo Pérez diante da súa afección na despedida do ano e da primeira volta desta fase inicial da Liga 2020/21.
Logo duns comezos vacilantes os valdeorreses foron mellorando e gañando en intensidade, pra achegarse até a porta defendida por Diego con varias ocasións pra estrear o marcador. Combinacións entre Juanito e Rodri, disparos dende lonxe dun moi activo Carlos Villar, ou un remate de cabeza do propio Juan Bazo…, ben puideron abrir a conta goleadora pra os de Valdeorras na primeira metade. Os da parroquia porriñesa, pola súa banda, amosáronse neste período como un cadro combativo, incómodo, mais sen opcións claras, inoperante, fronte a porta rival. Porén, xa no arrinque do segundo tempo, a primeira ocasión foi do bando visitante, nun duro disparo que marchou por riba dos paus de Iván Oviedo por pouco. A partir de aquí animouse, e moito, a contenda. Case que a seguir Óscar estrelou un balón na base do poste, cos de vermello en plena ofensiva na busca do gol que desfixese a igualada. E así no min. 57 outro lanzamento de Juanito marcharía por riba da portaría pontevedresa. No 59, froito dunha fermosa acción de desbordamento pola banda dereita do capitán Rubén García chégalle o coiro no segundo pau a Óscar Martín, que dun durísimo disparo raso e cruzado bate a porta visitante. Eran os mellores minutos dos valdeorreses e semellaba que a cousa ía collendo o xeito procurado. Logo virían novas oportunidades, outra volta nun remate de cabeza de Juanito Bazo que salva ben o porteiro Diego no min. 63, e mais tarde nun lanzamento dende lonxe de David Álvarez no 68. E até aquí pra os da casa que pareceron esgotar o combustíbel e chegaron ao treito final moi tocados fisicamente. No último cuarto de hora tocoulles sufrir e o partido fíxoselles moi longo. Tanto que os porriñeses xa avisaron das súas intencións no min. 86, cun lanzamento que marchou por riba do traveseiro de Oviedo por poucos centímetros. E xa ao bordo dos noventa minutos regulamentarios, unha falta perigosa botada nas proximidades da área local atopou o contacto xusto de Vilán pra mandar a bóla ao fondo das redes. O gol, á parte dun xarro de auga fría pra os locais, supuxo o tanto que habería de ser xa o resultado definitivo. Marcador final con resaibo amargo no cadro valdeorrés e con gusto a vitoria pra os visitantes.

Crónica de Xavier R.A. e Imágenes de Sandra García. <<Facebook>>

ACTA DEL PARTIDO

Página oficial de la Federación Gallega de Futbol.

RESUMEN DEL PARTIDO OFRECIDO POR EN XOGO

Por razones de privacidad Facebook necesita tu permiso para cargarse.
I Accept